Il progjet CrossTerm al è tacât tal mês di Jugn dal 2024 cuntun incuintri introdutîf, li che a àn partecipât ducj i partners di progjet e lis istituzions coinvoltis. Dopo di chest incuintri, al è stât fat un event di presentazion indreçât sedi al grant public che ai esperts, li che il partner cjâf di file al à rimarcât la impuartance di une terminologjie clare e armonizade par miorâ il funzionament de aministrazion publiche intes areis transfrontalieris.

Inte seconde metât dal 2024, lis ativitâts dal progjet (WP1) si son concentradis su la comprension des esigjencis concretis inte aministrazion publiche. Intes riunions dai focus grup, i partners a àn racuelt lis esperiencis dai dipendents publics e a àn identificât lis dificoltâts terminologjichis plui frecuentis intal lavôr multilengâl. I contribûts cjapâts sù a son stâts presentâts intune conference comune a Cjaudistrie e publicâts intune racuelte dedicade.

Su la fonde di chescj risultâts, a son stâts costituîts grups di lavôr transfrontalîrs (WP2) che, inte prime metât dal 2025, si son dedicâts ae standardizazion de terminologjie in diviers ambits tematics (dirit dal lavôr, urbanistiche e planificazion teritoriâl, toponomastiche, titui di studi e cualifichis professionâls). Dilunc dai incuintris, i partecipants a àn confrontât i tiermins in diviersis lenghis, a àn verificât il lôr ûs inte legjislazion e intai documents uficiâi, e a àn cirût traduzions claris. Il risultât di chest lavôr al è stât la creazion graduâl di glossaris multilengâi che a judaran i diviers orghins de aministrazion publiche inte cooperazion transfrontaliere, e la elaborazion di un model cu lis liniis vuide par une standardizazion terminologjiche plui valide.

Doi grups di lavôr si son interessâts di toponomastiche e de promozion des lenghis minoritariis e de ativitât multilengâl, intant che un grup di vore al à preparât la plateforme online cuntun strument di consulence terminologjiche (WP3).

A vuê (Zenâr–Fevrâr dal 2026) o sin daûr a prontâ workshops pai servizis tecnics de aministrazion publiche e pal grant public, intant che pe fin di Març o sul tacâ di Avrîl e je previodude la conference finâl, là che al vignarà presentât il document strategjic (WP4).